الحمد لله ان بدعة النائب "الهندي" بتجريم دخولنا "لكربلائنا" ما جانت موجودة بيوم الي احتاجت كربلاء زلم تحميها من داعش .
الحمد لله ما جان اكو "هندي" بيومها ، من جانت فزعة ولد الملحة مدافع ياهو اليوصل كربلا اول خاف داعش تستحلها
سيادة النائب ، كربلاء عد اهل الناصرية والبصرة والعمارة وكل اهل العراق مو مجرد رقعة جغرافية وتصميم قطاعي واحياء سكنية ، كربلاء بالنسبة الهم وطن بالدنيا وباب للجنة ، شيء روحاني جوه بگلوبهم ، شلون تريد تمنعهم منها بمبررات مادية وبكتابنا وكتابكم.
شلون تريد تقنع مخبل بحب الحسين يصلي على تراب كربلاء خمس مرات باليوم ، ومن يتمرض ماتردله العافية الا يمسح وجه بتراب كربلاء وتربة الحسين ، شلون تريد تقنعه ان هذا التراب محرم عليه
سيادة النائب الهندي ، اذا صارتلك جيه للناصرية وشفت صور الشهداء معلگه على الجسور وبالساحات العامة فذوله كلهم سقطوا دفاعا عن كربلاء ، حتى الي استشهد بالموصل جان يقاتل هناك حتى يمنع داعش توصل كربلاء ، والي استشهد بصلاح الدين حتما تلكه بايده علگ جايبه من كربلاء ، والي نزف حتى الموت بمعارك الانبار اكيييد بجيبة تربة حسين من تراب كربلاء ، كل شهيد بهذا الوطن استشهد من اجل تراب كربلاء
وتجي هسه حضرتك تمنع عنا كربلاء
سيادة النائب بعض الامور لا تقاس بمعايير واحد زائد واحد يساوي اثنين ، يمكن لاي محافظة اخرى ان تضع معايير تميزية كالتي وضعتها حضرتك بمنع ابناء المحافظات الاخرى من السكن فيها ، ننتقدهم في وسائل الاعلام نرفع دعاوى عليهم اذا استدعى الامر ، لكن في كربلاء الامر مختلف ، هاي دار ابونا حسين وما يمنعنا عنها لا صيني ولا هندي
